Gonayiv, otorite yo lage koukouwouj dèyè machann k ap vann gaz nan lari

Kreyòl Enfo, premye avril 2019 .- Komisè gouvènman Gonayiv la, Mèt Serard Gasius, nan tèt kole ak lameri lage koukouwouj dèyè tout machann k ap vann gaz nan divès kwen nan site lendepandans la.

Chèf pakè a ak ekip li ki deja sezi plizyè galon ak doum gaz di pratik sa reprezante yon danje pou sekirite vil la ak tout sitwayen yo.

Kèk machann ki pale ak Kreyòl Enfo rekonèt vann gaz nan lari se yon gwo malè ki pandye sou tèt yo ak lòt sitwayen vil la. Toutfwa, machann sa yo mande komisè gouvènman an yon chans pou fin vann rès gaz yo te achte depi moman latwoublay fevriye 2019 yo.

Malgre yo rekonèt danje pratik sa reprezante, gen kèk chofè taksi moto nan site lendepandans la k ap tante defann moun k ap vann yo. Chofè yo siyale se gras ak machann gaz nan lari yo rive mennen aktivite yo nan moman gen pwoblèm gaz nan ponp yo.

Vann gaz nan lari se yon pwoblèm sekirite piblik sitou nan yon peyi ki pa menm gen yon bon sèvis ponpye.

Docteur Rolguy