Kreyòl Enfo, 3 jiyè 2020.- Asosyasyon lidè evanjelik ayisyen yo nan vil Gonayiv (ALEHG) denonse atik 5 nan dekrè prezidansyèl 11 mas 2020 an ki pale sou Kat Idantifikasyon Nasyonal Inik ak Nimewo Idantifikasyon Nasyonal Inik la. Manb ALEHG yo kwè piblikasyon atik sa ki mande pou tout moun ki fè chanjman nan kò yo avèti Ofis Nasyonal Idantifikasyon (ONI) se yon mannèv pou pouvwa Tèt Kale a legalize pratik masisi ak madivin nan peyi a.
Vis prezidan Asosyasyon lidè evanjelik ayisyen yo nan Gonayiv (Latibonit), Pastè Roosevelt Augustin, di popilasyon an pap aksèpte sa atik sa ki kontrè ak « ensèyman Bondye kite pou pitit li yo atravè labib. » Pastè Roosevelt Augustin mande sektè evanjelik la mobilize pou evite kòlè Bondye tonbe sou peyi a menm jan sa te fèt nan vil Sodòm ak Gomò.
Gen gwo chita pale k ap fèt nan mitan pastè evanjelik yo nan depatman Latibonit la pou louvri legliz yo dimanch 5 jiyè k ap vini la a san otorizasyon Leta. Pastè yo di se pa Kowonaviris ki fè otorite yo mande pou tout legliz rete fèmen, men pito yon estrateji pou lidè espirityèl yo pa mobilize fidèl yo pou bare pwojè imoral ki nan dekrè prezidan an ap pibliye dènye jou sa yo.
Kreyòl Enfo