Home politik Gonayiv : lameri bloke yon distribisyon materyèl ak sansibilizasyon Pitit Desalin ta pral fè kont kovid-19

Gonayiv : lameri bloke yon distribisyon materyèl ak sansibilizasyon Pitit Desalin ta pral fè kont kovid-19

by Kreyòl Enfo

Kreyòl Enfo, 15 me 2020.- Pòt pawòl pati politik Pitit Desalin nan vil Gonayiv, Mackendy Pierre-Louis, kritike majistra Neil Latortue li di ki bloke yon aktivite lidè pati a, Moise Jean-Charles, ta pral òganize pou sansibize popilasyon an kont pandemi nouvo kowonaviris la.

Lidè Pitit Desalin nan, Jean-Charles Moise, nan yon lopital ki resevwa viktim Kovid-19 (Foto fesbouk)

Mackendy Pierre-Louis presize, nan kad aktivite sa, Pitit Desalin ta pral dezenfekte plizyè zòn nan site lendepandans la epi distribye materyèl ak kit sanitè bay popilasyon an.

Pòt vwa Pitit Desalin nan vil Gonayiv la kwè se dosye politik rèsponsab lameri yo ap regle ak ansyen senatè Nò a ki fè yo anpeche aktivite a fèt. Li estime aksyon Jean-Charles Moise ap poze nan enterè moun ki pi pòv yo fè anpil politisyen pè nan peyi a.

Direktè kominikasyon meri Gonayiv la, Samuel Thélusma, ki reyaji sou ansanm akizasyon sa yo fè konnen lameri pa bloke aktivite ki te prevwa a men, li mande yon chita pale ak ekip Pitit Desalin nan pou pi byen planifye epi evite tout pwoblèm sekirite.

Direktè kominikasyon an siyale pwoblèm administratif ki te genyen nan fason Pitit Desalin te planifye aktivite sa. Samuel Thélusma di lameri pa gen pwoblèm ak okenn kan politik.

Lidè Pitit Desalin nan, Jean-Charles Moise, deja distriye materyèl ak ekipman medikal nan plizyè depatman nan kad batay kont epidemi kovid-19 la ki kòmanse gaye nan tout peyi a.

Kreyòl Enfo

0 comment