San respè pou diyite prezidan Jovenel Moise, foto kadav li anvayi rezo sosyal yo

👤 Kreyòl Enfo

Youn nan foto radyografi kadav Prezidan Jovenel Moise

Kreyòl Enfo, 11 jiyè 2021.- Plizyè foto kadav prezidan Jovenel Moïse anvayi rezo sosyal yo depi aswè samdi 10 jiyè 2021. Imaj yo pèmèt moun konstate tout vyolans asasen yo itilize pou egzekite prezidan an nan lanwit 6 pou louvri 7 jiyè 2021 an.

Foto yo montre ansyen chèf Leta a resevwa katouch nan lèstomak, nan vant, nan ponyèt ak plizyè lòt pati nan kò l. Gen imaj radyografi ki montre tou kriminèl yo kase men, pye epi pete yon je Jovenel Moise.

Foto sa yo k ap fè laviwonn rezo sosyal yo endiye sosyete a. Menm sitwayen ki te opoze ak politik administrasyon Jovenel Moise la revòlte devan imaj sa yo epi egzije bon jan limyè sou asasina brital sa.

Anpil obsèvatè ap mande kiyès ki pibliye foto prezidan an? Kiyès ki te gen aksè pou rive bò kote kadav la? Nan ki objèktif foto kadav chèf Leta a pran lari? Yon seri kesyon otorite yo ta dwe reponn pou sosyete a.

Kreyòl Enfo

ou ka enterese