Fòlibète : pwoblèm blakawout lakoz 2 jèn gason pèdi lavi yo nan yon aksidan

Kreyòl Enfo, 10 mas 2019 .- Woodjery Nestan, 19 lane, ak Widly Vincent, 20 lane, se 2 jèn gason ki pèdi lavi yo nan yon aksidan, yèswa samdi a, sou wout nasyonal nimewo 6 la (RN6), toupre Fòlibète(Nòdès).

Enfòmasyon ki rive jwenn Kreyòl Enfo konfime 2 jèn gason sa yo te sou yon moto k al frape nan dèyè yon gwo machin baskil ki te pran pàn nan wout la. Selon kèk temwen, viktim yo pat ka wè machin baskil la tèlman fè nwa sou wout nasyonal nimewo 6 la.

Abitan yo repwoche otorite ki kite wout nasyonal nimewo 6 la nan fè nwa, san konte bèt k ap kouri nan lari a tout lanwit. Sa ki reprezante yon malè pandye sou tèt chak sitwayen k ap pase sou wout nasyonal sa, toujou daprè sitwayen yo.

Jij depè nan tribinal Fòlibète a, Jacques Philippe Vincent, te fè konsta legal yo epi bay lòd pou leve kadav yo.

Kreyòl Enfo