Home Aktyalite Fiziyad : 6 jèn gason tonbe anba bal Kafou, abitan zòn nan lonje dwèt sou lapolis

Fiziyad : 6 jèn gason tonbe anba bal Kafou, abitan zòn nan lonje dwèt sou lapolis

by Kreyòl Enfo

Kreyòl Enfo, premye desann 2019 .- Sis (6) jèn gason pèdi lavi yo pandan yon fiziyad nan lanwit samdi pou louvri dimanch premye desann 2019 la nan katye Maryani, komin Kafou.

Kèk abitan nan zòn nan ki pale ak redaksyon Kreyòl Enfo (KE) lonje dwèt sou lapolis. Sitwayen sa yo fè kwè se yon gwoup endividi ki te  » nan yon machin Lapolis san plak ki simen katouch sou yon gwoup jèn ki te reyini nan katye a. »

Youn nan lidè opozisyon an, Mèt André Michel di  » masak Maryani ak lòt katye popilè yo rantre nan kad estrateji pouvwa a pou kraze mobilizasyon pèp la k ap egzije demisyon Jovenel Moise. »

André Michel raple plis pase 50 jèn deja pèdi lavi yo depi kòmansman pwotestasyon kont pouvwa Tèt Kale a. Li konseye popilasyon an rete mobilize pou kouri dèyè Jovenel Moise li di ki vle tabli yon diktati nan peyi a.

Twa (3) lòt jèn gason ki te soti blese pandan fiziyad sa ap resevwa laswenyay sou kabann lopital, daprè yon notab nan zòn nan.

Malgre plizyè tantativ nan telefòn, okenn rèsponsab nan Lapolis la poko vle reyaji sou dosye a.

Kreyòl Enfo

0 comment