Home Entènasyonal Etazini : Polisye ki asasinen George Floyd la jwenn arèstasyon l

Etazini : Polisye ki asasinen George Floyd la jwenn arèstasyon l

by Kreyòl Enfo

Kreyòl Enfo, 29 me 2020.- Polisye Derek Chauvin ki te mete ajenou sou kou ameriken nwa George Floyd jouk li toufe nan vil Minneapolis, Etazini, jwenn arèstasyon l jodi vandredi a (29), daprè komisè John Harrington, nan depatman Sekirite sivil Minnesota. Derek Chauvin pral reponn pou omisid ak asasina nan twazyèm degre.

Polisye Derek Chauvin

Nan yon kominike, fanmi Floyd di akizasyon kont Chauvin yo « byenvini », men yo pa sifi. Fanmi an egzije yo akize Derek Chauvin pou omisid nan premye degre ( lè lotè a konnen zak l ap komèt ka lakoz lanmò), epi akize fòmèlman lòt polisye ki te akonpaye l yo.

Fanmi an anonse tou yo deja pran kontak ak yon medsen lejis prive pou reyalize otopsi kadav George Floyd, paske yo pa kwè nan pwofesyonèl ki nan lapolis Minnesota yo.

Lanmò jèn gason ameriken nwa sa aprè yon polisye blan te fin arete l lakoz gwo latwoublay nan peyi Etazini. Minneapolis, vil kote polisye blan an komèt krim nan, manifestan mete dife nan plizyè lokal biwo Leta. Nan vil Nouyòk, plizyè dizèn manifestan jwenn arèstasyon yo pandan yo t ap twoke kòn yo ak lapolis.

Kreyòl Enfo

0 comment