Home Aktyalite Etazini louvri yon ankèt pou gade si kowonaviris pa soti nan laboratwa peyi Lachin

Etazini louvri yon ankèt pou gade si kowonaviris pa soti nan laboratwa peyi Lachin

by Kreyòl Enfo

Kreyòl Enfo, 17 avril 2020 .- Prezidan Donald Trump konfime pandan yon konferans pou laprès, jedi 16 avril la, Etazini ap mennen ankèt pou detèmine si se pa nan yon laboratwa vil Wuhan nouvo kowonaviris la chape epi gaye nan tout mond la.

Se Fox News ki premye pale sou posibilite pou viris la ta soti nan yon laboratwa chinwa ki pat gen bon jan sekirite. Jounalis Fox News yo di yo jwenn enfòmasyon sa nan men plizyè sous ki gen aksè ak gwo dokiman sekrè.

Daprè sous ki bay televizyon Fox News enfòmasyon yo, se pa nan yon mache vil Wuhan nouvo kowonaviris la te enfekte yon premye moun. Vèsyon sa ta yon istwa gouvènman chinwa a kreye pou jistifye kòmansman pandemi a.

Donald Trump di « n ap mennen yon ankèt ak anpil atasyon sou sitiyasyon tèrib sa ki rive a. Madi pase a, kòmandan lame amerikèn nan, jeneral, Mark Milley, di posibilite pou viris la soti nan laboratwa a egziste, menm si anpil endis montre kovid-19 la gen yon orijin natirèl.

Pou sous sa yo, « pasyan zewo » a t ap travay nan laboratwa kote gouvènman chinwa t ap fè rechèch sou kowonaviris nan objèktif pou montre peyi a gen kapasite pou goumen kont epidemi, nan kad yon « batay syantifik ».

Gouvènman Britanik ak Lafrans ap fè presyon tou sou otorite chinwa yo ki, daprè dirijan oksidantal yo, ta kache enfòmasyon sou orijin viris la.

Kreyòl Enfo

0 comment