Etazini : lajistis pap rapouswiv « mèsenè » lapolis te arete Ayiti yo

Kreyòl Enfo, 22 fevriye 2019 .- Senk (5) ameriken ki te pami endividi lapolis te arete ak yon dividal zam 17 fevriye pase a pa gen okenn akizasyon kriminèl sou do yo Etazini, daprè yon atik Miami Herald.

Lajistis amerikèn pap rapouswiv endividi sa yo ki te《transfere》Etazini nan yon avyon komèsyal 20 fevriye pase a, daprè enfòmasyon yon sous federal pataje ak jounal la. « Mèsenè » sa yo ta deklare yo t ap asire sekirite yon《biznisman》k ap travay pou gouvèman ayisyen an.

Se minis jistis ayisyen an, Jean Roody Aly ki ta siyen otorizasyon pou etranje yo kite peyi a san avèti prezidan ak premye minis la.

Michael Estera, ayisyen ki te ansanm ak lòt sèt (7) etranje yo fèmen nan gadavi Direksyon santral polis jidisyè (DCPJ). Avoka k ap defann mouche Estera yo egzije liberasyon l menm jan, yo di, etranje lib nan peyi Etazini.

Kreyòl Enfo