Kreyòl Enfo, 23 jen 2020.- Ansyen lidè Fwon pou Avansman ak Pwogrè Ayisyen yo (FRAPH, sig nan lang franse), Emmanuel « Toto » Constant debake Pòtoprens, jodi mad23 jen an, nan yon vòl espesyal imigrasyon amerikèn. Ajan Direksyon Santral Polis Jidisyè (DCPJ) mete lapat sou Toto Constant depi nan ayewopò entènasyonal Tousen Louvèti.
Enfòmasyon yon sous nan lapolis pataje ak redaksyon Kreyòl Enfo (KE) fè kwè kriminèl la deja nan penitansye nasyonal aprè li te fin reponn kesyon DCPJ pandan sèlman kèk minit.
Ansyen lidè FRAPH yo te fèmen nan yon prizon Nouyòk, Etazini, kote administrasyon amerikèn nan mete gwo kriminèl ki reprezante yon menas pou sosyete a. Lajistis repwoche Emmanuel « Toto » Constant ak òganizasyon li a (FRAPH) pou plizyè krim ak mesak yo komèt sou popilasyon ayisyèn nan aprè koudeta kont prezidan Jean Bertrand Aristide 30 septann 1991.
Otorite amerikèn yo depòte kriminèl la malgre minis afè etranjè Ayiti a, Claude Joseph, te anonse dirijan ayisyen ak ameriken yo jwenn yon antant pou kontinye kenbe Toto Constant Etazini.
Pandemi nouvo kowonaviris la pa anpeche Etazini kontinye ap depòte ayisyen yo estime ki pa ranpli kondisyon pou rete sou tèritwa yo. Pandan 3 dènye mwa, anviwon 4 avyon imigrasyon amerikèn gentan debake Pòtoprens. Pou pi piti, 3 pami konpatriyòt sa yo rive nan peyi a tou kontamine ak kovid-19.
Kreyòl Enfo