Eskonbrit nan Katedral Gonayiv : Jij Denis Pierre Michel rann òdonans li

Kreyòl Enfo, 6 jen 2018.- Jij enstriktè Denis Pierre Michel rann, mèkredi 5 jen 2019 la, òdonans kloti sou ankèt li t ap mennen sou eskonbrit ki te pete andedan katedral Gonayiv la, 4 novanm 2018 la, kote plizyè moun te soti blese.

Nan òdonans lan, jij enstriktè a mande tribinal koreksyonèl jije divès endividi ki ta mele nan dosye sa tankou Roldy, Ti Miguel, Tiblan, Fritznel ak Doumyck Moss. Sepandan, Mèt Denis Pierre Michel di retire non Gracia Mergélus ak Fénel Néus pami sispèk yo akoz li pa jwenn ase prèv.

Avoka k ap defann enkilpe yo, Mèt Jean-Charles Etienne, anonse li deja atake desizyon kabinè denstriksyon an nan Lakoudapèl jiridiksyon an. Jiris la di li remake yon pakèt pwen ki pa klè nan desizyon Jij Denis Pierre Michel la. Mèt Jean-Charles Etienne swete lalwa triyonfe nan kad dosye sa.

4 novanm 2018, gwo eskonbrit te pete nan katedral Gonayiv nan mitan 2 gwoup sitwayen pami yo youn ki t ap mande Kot Kòb Petwo Karibe a?

Kreyòl Enfo