Eskonbrit nan dwàn Malpas : 8 moun mouri ak 5 lòt blese, daprè yon dènye bilan

Pòtoprens, samdi 24 novanm 2018.- Kantite moun ki viktim pandan deblozay sou fwontyè Malpas ak Jimani ( lwès ) jodi samdi a (24) ogmante. Eskonbrit sa ki te pete nan mitan yon ajan dwanye ak yon chofè kamyon ki t ap soti Sendomeng lakoz uit (8) moun pèdi lavi yo ak senk (5) lòt blese, daprè yon responsab nan lapolis.

Responsab la presize pou Kreyòl Enfo popilasyon an rache ak manchèt epi mete dife sou ajan dwanye ki te nan kòmansman diskisyon an. 4 lòt ajan ta mouri toufe nan lafimen pandan yo te kouri al kache andann lokal la ki boule rapyetè.

3 manm nan popilasyon an mouri tou pandan eskonbrit sa ki dire plizyè èd tan. Responsab nan Lapolis la di yo konte 5 moun ki soti blese pandan dram sa.

Aprè midi a, plizyè inite espesyalize nan Lapolis la deplòtonnen sou fwontyè pou kontwole sitiyasyon an.

Nan moman n ap ekri tèks la (5:15), okenn kominikasyon ofisyèl poko parèt sou trajedi sa.

Kreyòl Enfo