Ensekirite : yon pwofesè lekol tonbe anba bal bandi nan komin Tyòt (Sidès)

👤 Kreyòl Enfo

Kreyòl Enfo, 25 dawout 2020.- Endividi otorite yo poko idantifye touye anba bal, nan lanwit lendi pou louvri madi 25 dawout la, sitwayen Robenson Pierre nan zòn Kolonbye, yon lokalite nan komin Tyòt (depatman Sidès). Robenson Pierre se yon pwofesè ki te konn fè kou nan plizyè lekòl nan vil la.

Daprè temwayaj kèk abitan nan zòn Kolonbye, viktim nan se te pwopriyetè tou yon ti kès popilè ki pote non « TIPA » kote sitwayen nan lokalite a te konn sere lajan yo. Pwofesè Robenson Pierre te konn prete moun nan kanton an lajan tou pou fè biznis oubyen rezoud pwoblèm pèsonèl yo, toujou daprè abitan yo.

»   Lapolis mete lapat sou "Bawon", youn nan chèf gang Savann Pistach yo

Li te bò minwi konsa nan moman atoufè yo rantre kay pwofesè a, sezi kès li te konn sere lajan an epi simen katouch sou li. Viktim nan resevwa plizyè bal nan tèt.

Asasina Robenson Pierre lage anpil lapenn nan kanton an. Peyizan yo mande otorite nan depatman Sidès la fè tout mannèv pou fouke kriminèl yo epi bay jistis ak fanmi pwofesè Robenson Pierre yo di ki te yon gwo notab nan zòn nan.

Kreyòl Enfo

ou ka enterese