Home Ensekirite Ensekirite : yon militan politik pwòch ansyen senatè Antonio « Don K-to » Cheramy tonbe anba bal bandi

Ensekirite : yon militan politik pwòch ansyen senatè Antonio « Don K-to » Cheramy tonbe anba bal bandi

by Kreyòl Enfo

Kreyòl Enfo, 17 me 2020 .- Militan politik Jean Gana Joseph pèdi lavi l anba bal endividi otorite yo poko rive idantifye, aprè midi samdi 16 me a, nan zòn Pènye 17, komin Petyonvil.

Militan politik Jean Gana Joseph pandan yon manifestasyon kont prezidan Jovenel Moise (foto fesbouk)

Daprè enfòmasyon ki rive jwenn redaksyon Kreyòl Enfo (KE), militan an t ap soti nan yon reyinyon politik nan moman bandi ak zam parèt epi simen bal sou li.

Jean Gana Joseph se yon militan politik ki patisipe nan anpil mouvman pwotestasyon kont pouvwa Tèt Kale a. Li te konn planifye epi òganize aktivite politik nan zòn metwopolitèn Pòtoprens la sitou nan komin Site Solèy. Militan politik la te pwòch ansyen senatè Antonio Cheramy alyas Don K-to.

Jean Gana Joseph tonbe anba bal 2 jou avan gwo mobilizasyon plizyè sektè nan opozisyon an anonse kont pouvwa a demen lendi 18 me 2020 an.

Kreyòl Enfo

0 comment