Ensekirite : Yon lòt polisye tonbe anba bal Site Solèy

Kreyòl Enfo, 29 avril 2019 .- Endividi ak zam otorite yo poko idantifye asasinen, jodi lendi a (29), polisye Gabriel Fertil nan komin Site Solèy.

Enfòmasyon ki rive jwenn Kreyòl Enfo konfime Gabriel Fertil te nan yon machin piblik nan moman bandi yo parèt epi louvri katouch sou li. Atoufè yo pran zam viktim nan tou aprè yo fin komèt krim nan, daprè jij depè Evens Levèque ki te fè konsta legal yo.

Gabriel Fertil, ajan II, te soti nan 18e pwomosyon lapolis la. Li t ap travay nan Direksyon Sikilasyon ak Polis Woutyè (DCPR, sig nan lang franse).

Bandi ak zam pa sispann simen dèy nan mitan popilasyon an ak lapolis. Pandan kat (4) premye mwa ane 2019 la, anviwon ven (20) polisye deja tonbe anba bal zagoloray.

Kreyòl Enfo