Home Aktyalite Ensekirite : yon chofè dominiken tonbe anba bal nan zòn Gantye

Ensekirite : yon chofè dominiken tonbe anba bal nan zòn Gantye

by Kreyòl Enfo

Kreyòl Enfo, 6 mas 2020 .- Bandi ak zam touye jodi vandredi a yon chofè dominiken nan zòn Papay, yon lokalite nan komin Gantye, depatman lwès. Yon lòt chofè ki te akonpaye viktim nan te gentan chape poul li epi al pran refij li nan komisarya Gantye a, daprè enfòmasyon youn nan rèsponsab GARR yo, Geralda Sainvil, pataje ak redaksyon Kreyòl Enfo (KE).

Se manm gwoup gang 400 mawozo, chèf bandi « Lanmò 100 jou » ap dirije, ki ta komèt krim sa. Viktim nan ki rele Morales Ismaël Lopez gen 34 lane.

Evens Carriès, yon mekanisyen ki te nan yon machin lapolis blese anba bal bandi jodi a tou nan menm zòn nan. Pou kounye a, Evens Carriès ap pran laswenyay nan yon lopital nan kapital la.

400 mawozo se youn nan gang ki komèt anpil krim nan zòn metwopolitèn Pòtoprens. Chofè ak pasaje k ap pran wout pou ale Malpas, nan fwontyè Ayiti ak Sendomeng, pa konn ki sen pou yo priye pou ede yo ak manm gang sa ki pa sispann dechèpiye yo.

Kreyòl Enfo

0 comment