Kreyòl Enfo, 14 me 2020 .- Lubin Uberman moun plis konnen sou non atis » Biggy » pèdi lavi l anba bal bandi, aswè mèkredi 13 me 2020 an, nan zòn ri Kapwa, Pòtoprens. Viktim nan se yon rapè ki te nan gwoup Espas nan kòmansman ane 2000 yo.
Enfòmasyon ki rive jwenn redaksyon Kreyòl Enfo (KE) fè kwè « Biggy » t ap soti nan ri Chavàn nan moman plizyè endividi agrese madanm li ki te akonpaye l. Atis la reyaji epi bouskile youn nan yo endividi yo.
Aprè ensidan an, Lubin Uberman te pran direksyon yon biznis kopi ak enpresyon li genyen nan ri Kapwa, bò Channmas. Bandi yo ki te swiv atis la ta pral mete bout nan lavi l ak plizyè katouch.
Kriminèl yo wete lavi rapè a devan youn nan pitit li ak tout madanm li. Aprè zak la, bandi yo chape poul yo san pwoblèm.
Biggy, 43 lane, mouri kite plizyè pitit. Fanmi ak zanmi viktim nan mande otorite yo arete epi pini tout moun ki mele nan komèt krim sa.
Kreyòl Enfo