Kreyòl Enfo, 18 janvye 2021 .- Yon ajan sekirite Fon Inyon tout Nasyon yo pou Timoun (UNICEF) tonbe anba bal bandi otorite yo poko idantifye nan mitan jounen lendi 18 janvye 2021 an. Bandi yo komèt krim nan tou pre lokal konpayi Digicel la, nan kalfou avni Jan Pòl 2 ak ri Aman Oly, katye Tijo.
Kadav ajan sekirite UNICEF la bandi touye nan zòn Tijo
Kèk temwen ki pale ak redaksyon Kreyòl Enfo (KE) eksplike se pandan ajan sekirite a t ap soti nan yon bank komèsyal bandi yo parèt epi simen katouch sou li. Anplwaye UNICEF la ki te resevwa plizyè katouch rann dènye souf li nan menm moman an.
Temwen yo ki te panike pandan zak la pat ka konfime si atoufè yo pran lajan viktim nan ta sot retire nan bank la. Poko gen presizyon tou sou non sitwayen sa machin ensekirite wete lavi l jodi a.
Pèsòn pa epanye anba zak ensekirite yo nan zòn metwopolitèn Pòtoprens la. Pandan wikenn nan, bandi ak zam fè dappiyanp (kidnape) sou plizyè sitwayen nan kapital la. Demen madi a, yon gwoup sitwayen kase randevou devan kay premye minis Joseph Jouthe pou y al plante pikèt yo nan lide pou mande otorite yo pran rèsponsabilite yo epi garanti sekirite popilasyon an.
Kreyòl Enfo