Ensekirite : Sitiyasyon an mangonmen nan Site Solèy ak Lasalin

Kreyòl Enfo, 15 avril 2019 .- Sitiyasyon an toujou rete mangonmen, jodi lendi a (15), nan komin Site Solèy ak katye Lasalin (Pòtoprens) kote bandi ak zam ap simen latwoublay. Polisye ki nan komisarya Site Solèy la, ansanm ak ajan ki nan baz Inite depatmantal pou tabli lòd (UDMO) pa mete pwent pye yo deyò, daprè enfòmasyon abitan zòn nan pataje ak Kreyòl Enfo (KE).

Yon ajan UDMO ki pa vle non l site presize « bandi yo pa atake polisye » sepandan, li eksplike polisye yo rete fèmen nan baz yo paske « poko gen okenn lòd ki bay pou kontrekare bandi yo » ki ta deja mete dife nan plizyè kay epi touye plizyè moun.

Sitiyasyon tansyon sa bloke tout aktivite nan zòn nan. Sitwayen ki paka soti pou regle aktivite yo kònen lanbi pou mande otorite yo pran rèsponsabilite yo.

Zagoloray rekòmanse fè lalwa nan komin Site Solèy ak zòn ki viwonnen l yo depi semèn pase a. Anviwon 3 lane depi yon van lapè te kòmanse soufle sou komin nan.

Kreyòl Enfo