Ensekirite : moun Matisan mande sekou lapolis

Katye Matisan tounen lanfè pou sitwayen yo. Depi ayè dimanch la bandi ak zam anvayi zòn Sent Bènadèt, dezyèm, twazyèm ak senkyèm avni Bòlòs.

Enfòmasyon ki rive jwenn Kreyòl Enfo fè kwè gen plizyè moun ki deja pèdi lavi yo anba bal. Bandi yo ki gen gwo zam fann fwa pa epanye okenn moun sou wout yo, daprè sa yon sitwayen ki di li kouche anba kabànn lakay li eksplike nan telefòn.

Zagoloray yo kraze pòt, rantre lakay sitwayen yo epi vòlò tout sa yo ka pote. Plizyè sitwayen oblije kouri kite kay yo pou al pran souf kay zanmi ki abite nan lòt zòn.

Malgre sitiyasyon an dejenere depi ayè dimanch la, otorite yo poko jann pote sitwayen yo sekou devan bandi yo.