Kreyòl Enfo, 15 jen 2020.- Militan politik Auguste Richer moun plis konnen sou non « Titcho » mouri anba bal endividi otorite yo poko idantifye, douvanjou lendi 15 jen an, nan katye Raboto, komin Gonayiv, daprè enfòmansyon kolaboratè Kreyòl Enfo (KE) nan depatman Latibonit la konfime.
Viktim nan ki se yon ansyen polis palmantè resevwa plizyè katouch. Aprè konsta legal yo, otorite Gonayiv yo mete kadav militan politik nan yon mòg nan vil la.
« Titcho » se te youn nan militan ki t ap mennen mouvman kont prezidan Jovenel Moise ak pouvwa Tèt Kale a nan site lendepandans la. Li te toujou kanpe dèyè barikad nan zòn Raboto pandan peryòd mouvman « Peyi lòk » la.
Non militan « Titcho » site pami moun ki ta tire sou ansyen chèf rebèl Wilford Ferdinand alyas « Tiwil » 26 avril pase a . Anpil sitwayen pa kache preyokipasyon yo aprè lanmò militan politik sa.
Kreyòl Enfo