Ensekirite : fenomèn kidnaping lan frape Radyo ak Televizyon Ginen

👤 Kreyòl Enfo

Logo Radyo ak Televizyon Ginen

Kreyòl Enfo, 19 avril 2021.- Bandi ak zam fè dapiyanp sou John Colas alyas Fanfan, aswè dimanch 18 avril la, devan lokal Radyo ak Televizyon Ginen, Dèlma 31. Yon manm administrasyon Radyo ak Televizyon Ginen ki konfime enfòmasyon an presize « Fanfan » se youn nan chofè enstitisyon an.

Bandi yo rale zam epi pran John Colas nan moman li t ap desann machin li t ap kondwi a. Machin nan te gen logo Radyo ak Televizyon Ginen, daprè enfòmasyon ki rive jwenn redaksyon Kreyòl Enfo (KE). Viktim nan t ap sot kouvri yon aktivite espò nan kapital la.

Poko gen detay sou ki gwoup bandi ki kidnape anplwaye Radyo ak Televizyon Ginen an ni konbyen kòb atoufè yo egzije pou libere jèn gason sa.

»   Bandi boule pase 8 kay nan komin Dèlma

Fenomèn kidnaping lan pa epanye okenn sektè nan peyi a. Jodi lendi 19 avril la deja fè nèf jou depi yon gwoup relijye pami yo 5 pè ak 2 sè katolik anba men bandi 400 Mawozo k ap taye banda nan komin Kwadèboukè.

Otorite yo nan Leta a parèt san fòs pou kwape zak bandi yo ki pa sispann fè dlo koule nan je popilasyon an.

Kreyòl Enfo

ou ka enterese