Kreyòl Enfo, 14 oktòb 2020.- Endividi otorite yo poko rive idantifye atake ak kout zam, ayè madi a, Palè jistis Gonayiv la (Latibonit) epi fòse rèsponsab lajistis yo mete bout nan yon odyans ki t ap fèt nan nivo koreksyonèl. Ajan fòs lòd ki te nan lantouray la te reponn ak anpil katouch tou pou anpeche bandi yo rantre nan lokal la.
Sitiyasyon sa te pwovoke gwo latwoublay nan site lendepandans la. Pwopriyetè depo, magazen ak lòt biznis ki nan sant vil la te oblije kouri fèmen pòt antrepriz yo. Anpil kout zam t ap chante tou nan plizyè katye nan vil la.
Daprè enfòmasyon kolaboratè Kreyòl Enfo (KE) nan depatman Latibonit la verifye, gen vit plizyè machin pami yo machin avoka ki kraze pandan lapolis t ap twoke kòn yo ak bandi yo. Pa gen moun ki pran bal pandan atak sa.
Sitiyasyon latwoublay sa pat deranje dewoulman egzamen ofisyèl elèv 9e ane fondamantal yo.
Kreyòl Enfo