Kreyòl Enfo, 30 avril 2020 .- De (2) moun tonbe anba bal bandi jodi jedi a (30) nan zòn Pòtay Leyogàn, Sant Pòtoprens. Pami viktim yo gen yon machann sentiwon.
Yon temwen ki pale ak redaksyon Kreyòl Enfo eksplike se manm baz « 5 segong » ki soti Vilaj Dedye ki ta kòmèt krim nan. « Bandi yo debake epi simen katouch sou sitwayen onèt k ap regle aktivite yo », toujou daprè temwen sa ki presize gen lòt moun ki blese tou pandan fiziyaz la.
Kadav viktim yo rete pandan plizyè èd tan atè a san okenn otorite pa vin fè konsta legal yo. Sitwayen yo regrèt Leta ayisyen « abandone » 3e sikonskripsyon Pòtoprens ak zòn ki antoure l yo bay bandi.
Gen yon semèn depi minis Jistis ak Sekirite piblik la, Lucmane Delille, te bay 72 èd tan pou tout sitwayen kite Vilaj Dedye sou pretèks lapolis pral rantre pran bandi yo. 4 jou aprè delè sa, nèg ak zam toujou ap fè lalwa nan zòn nan.
Kreyòl Enfo