Ensekirite : bandi rantre anndan yon estidyo epi kidnape Kazèk dezyèm plenn Tigwav la

👤 Kreyòl Enfo

Kazèk Wilkens Dicette

Kreyòl Enfo, 25 avril 2021.- Endividi ak zam otorite yo poko rive idantifye fè dapiyanp, dimanch 25 avril la, sou Kazèk dezyèm plenn Tigwav la, Wilkens Dicette, nan komin Delmas. Bandi yo rantre pran kazèk la anndan yon estidyo kote li t ap koupe zong li, daprè enfòmasyon prezidan Asosyasyon Kazèk Tigwav yo, Petyon Frankèl, konfime pou redaksyon Kreyòl Enfo (KE).

Yon ti tan aprè enfòmasyon an te fin gaye nan komin Tigwav, abitan nan dezyèm seksyon te bloke wout la epi boule kawotchou pou mande liberasyon Kazèk la san pèdi tan. Pwotestatè yo ki t ap lanse anpil move pawòl kont otorite yo anonse gwo mouvman pou demen lendi a si Kazèk Wilkens Dicette pa retounen lakay li.

»   Kidnaping : nan kad yon "echanj ak Leta ayisyen", 400 Mawozo libere 3 nan otaj relijye yo

Youn nan pwotestatè yo mande pou « lage Kazèk Wilkens vagabon Pòtoprens kidnape aprè midi a. Nou swete tout otorite yo pran rèsponsabilite yo, nou bouke, nou pa kapab ankò ».

Yon jou pa janm pase san bandi ak zam pa fè dapiyanp sou sitwayen san defans nan zòn metwopolitèn Pòtoprens la. Nan kòmansman mwa avril la, atoufè te rantre anndan yon legliz epi ale ak plizyè relijye. Otorite k ap dirije peyi a pa fè anyen pou mete bout nan move zak bandi yo ki pa sispann frape lestomak yo pandan y ap montre dividal zam yo genyen sou tout rezo sosyal.

  1. Kreyòl Enfo

ou ka enterese