Kreyòl Enfo, 7 janvye 2021 .- Pandan yon gwoup polisye ap fè mannèv pou jwenn lajan pou peye liberasyon enspektè Wilner Séraphin ki anba men bandi depi 4 jou, nèg ak zam kidnape 2 lòt polisye yèswa mèkredi 6 janvye a. Atoufè yo pran 2 polisye yo nan zòn estasyon machin Gonayiv la ( Nò Pòtoprens), daprè pwòch youn nan viktim yo ki pale ak redaksyon Kreyòl Enfo (KE).
Yon sous nan Polis Nasyonal Ayiti a ki konfime enfòmasyon an presize 2 polisye bandi kidnape yèswa mèkredi a rele Ernst Théodor Sanon ak Jean Maxo Vincent. De (2) ajan sa yo ki nan Brigad Entèvansyon Motorize (BIM) t ap sot travay nan komin Kabarè nan moman bandi yo fè dappiyanp sou yo a, toujou daprè menm sous la.
Bandi yo ta reklame de (2) milyon dola vèt pou libere polisye yo. Nan kòmansman ane 2021 an, nèg ak zam ta deja pran pou pi piti 5 ajan nan polis nasyonal Ayiti a epi reklame gwo lajan pou libere yo. Yon sitiyasyon ki vin ogmante laperèz kay popilasyon an ki pa konnen kiyès pou yo rele pou frennen fenomèn sa.
Kreyòl Enfo