Home Aktyalite Eleksyon 2015 : endividi agrese yon jounalis radyo Melodi FM nan vil Kabarè

Eleksyon 2015 : endividi agrese yon jounalis radyo Melodi FM nan vil Kabarè

by Kreyòl Enfo

Kreyòl Enfo, 9 dawout 2015.- Sophar Sanon, jounalis radyo Mélodie FM, pase yon move moman, nan mitan jounen dimanch la (9), anba men yon gwoup endividi ak zam nan sant vòt lekòl nasyonal Sen Jera a, nan seksyon Sous Matla, komin Kabarè.

Jounalis la resevwa pataswèl ak anpil move pawòl anba men endividi sa yo ki ta manm yon gwoup gang ki rele « Baz 22 », daprè enfòmasyon kèk abitan nan zòn nan pataje ak redaksyon Kreyòl Enfo. Jèn gason sa yo ki te gen zam ak kouto nan men yo di yo se defansè kandida pou pòs depite sikonskripsyon kabarè anba banyè Fanmi Lavalas la, Joseph Manès Louis.

Sou chòk, direktè sal nouvèl Melodi FM nan denonse zak agresyon li viktim anba men bandi sa yo. Sophar Sanon di zak sa se vyolasyon dwa yon jounalis genyen pou fè travay li san kontret. Konfrè a kritike Lapolis li di ki pat prezan nan sant vòt sa pou garanti sekirite sitwayen ki te vin ranpli devwa sivik yo.

Sophar Sanon mande otorite nan Lapolis ak Lajistis pran dispozisyon pou fouke epi aplike lalwa kont bandi sa yo. Jounalis Reginald Remy k ap travay pou Karayib FM, ki li menm tou te nan sant vòt la men ki pa t asiste ak ensidan an, mande jistis ak reparasyon pou direktè sal nouvèl Melodie FM nan epi swete lidè politik yo sispann rantre nan kòkòday ak bandi pou genyen eleksyon.

Sophar Sanon eksplike se depi 18 jiyè endividi sa yo kòmanse fè l menas pandan li t ap kouvri kanpay pou yon lòt kandida pou pòs depite nan sikonskripsyon-an, Joseph Duckens Louisma.

Kreyòl Enfo

0 comment