Dyaspora : 2 sitwayen ayisyen pèdi lavi yo anba bal nan peyi Chili

👤 Kreyòl Enfo

Kreyòl Enfo, 3 me 2021.- De (2) migran ayisyen pèdi lavi yo anba bal, douvanjou samdi premye me a, nan mitan lari komin Maipú, peyi Chili. Daprè enfòmasyon plizyè medya chilyen pataje, 2 jèn ayisyen sa yo ki genyen 23 ak 31 lane viktim pandan yo t ap soti nan yon disko.

Kèk temwen ki pale ak otorite yo nan peyi Chili ekspkike se yon twazyèm ayisyen ki ta simen katouch sou viktim yo aprè yon gwo diskisyon ki te kòmanse depi nan disko a. Sispèk la te gentan chape poul li aprè li fin komèt krim nan.

Sèvis envestigasyon nan lapolis Chili (PDI) deja louvri yon ankèt sou zak la. Yo pwomèt pou mete lapat sou sispèk la epi trennen li devan lajistis.

»   Kovid-19 pouse prèske 25 000 Ayisyen kouri kite Sendomeng pou retounen Ayiti

Fenel Saintilma, yon konpatriyòt k ap viv Chili depi 2008, di li konstate plis migran ayisyen ap viktim anba zak ensekirite nan dènye moman sa yo. Li souliye plizyè ka kote se ayisyen ki wete lòt ayisyen parèy yo anba bal oubyen kout kouto.

Kreyòl Enfo

ou ka enterese