Dram : Yon nèg touye madanm li ak kout kouto nan vil Wanament

Kreyòl Enfo, 4 dawout 2019.- Yon jèn gason tout moun konnen sou non Jonel touye madanm li, douvanjou dimanch la (4), ak kout kouto nan zòn site Plannto, yon katye nan vil Wanament.

Viktim nan ki rele Danise Jean resevwa pou piti 2 kout kouto. Yon rèsponsab òganizasyon k ap defann dwa fanm nan depatman Nòdès la ki pale ak redaksyon Kreyòl Enfo konfime Danise Jean kite 3 pitit.

Jonel ki ta komèt krim sa akoz jalouzi te gentan chape poul li epi kite viktim nan ap benyen nan san li devan timoun yo.

Òganizasyon k ap defann dwa fanm nan depatman Nòdès yo kondane zak la epi mande otorite yo fè tout sak posib pou fouke kriminèl la.

Kreyòl Enfo