Home Aktyalite Dram : 28 ayisyen mouri nwaye nan lanmè Bahamas

Dram : 28 ayisyen mouri nwaye nan lanmè Bahamas

by Kreyòl Enfo

Kreyòl Enfo, 4 fevriye 2019 .- Pou pi piti 28 sitwayen ayisyen nwaye, douvanjou vandredi premye fevriye a, nan lanmè pandan yo t ap tantre rantre sou zile Bahamas nan yon ti bato.

Pastè Edner Memme, yon lidè nan kominote ayisyèn nan Bahamas, ki pale ak redaksyon Kreyòl Enfo nan telefòn presize gadkot Bahamas te gentan pote sekou bay dizuit (18) lòt migran ayisyen ki te nan menm ti bato a. Twa (3) pami moun ki chape yo te toujou ap pran laswenyay sou kabann lopital ayè dimanch la.

Reprezantan Ayiti ki nan peyi Bahamas ap fè demach pou antere kadav yo, daprè yon sous nan Ministè afè etranjè.

Ti bato sa ki te soti ak moun yo Pòdepè ta koule nan lanmè tou pre Bahamas aprè li te fin monte sou yon resif, toujou daprè enfòmasyon pastè Edner Memme.

Lamizè ki blayi sou Ayiti dènye jou sa yo se youn nan rezon ki lakoz jèn yo ap bwave tout danje pou al bouske lavi miyò nan lòt peyi.

Kreyòl Enfo

0 comment