Dosye zam Senmak : odyans Godson Aurelus la ranvwaye

Kreyòl Enfo, 27 mas 2019 .- Dosye dividal zam otorite yo te sezi nan waf Senmak la ap rapouswiv nan jiridiksyon Gonayiv. Odyans ansyen Direktè jeneral polis nasyonal la, Godson Orélus, ki te pwograme pou ayè madi a nan lakou dapèl ranvwaye pou 2 avril k ap vini la a.

Prezidan lakou dapèl la, Mèt Octélus Dorvilien ki konfime enfòmasyon an pou Kreyòl Enfo di l ap tann rekizitwa definitif chèf pakè Gonayiv la pou tribinal la rapouswiv ak dosye a.

Ayè madi a, jij yo te sèlman tande Madanm Sandra Thélusma ki li menm toujou fèmen nan prizon. Majistra yo pat akòde men leve pou Madanm Thélusma ki enkilpe nan dosye a sou pretèks tribinal la pa gen garanti l ap toujou rete disponib pou lajistis.

Mèt Dorvilien fè konnen odyans Sandra Thélusma a pèmèt lakou a jwenn kèk eleman ki kapab itil nan desizyon k ap gen pou pran sou dosye sa.

Docteur Rolguy