Dosye zam Senmak : jij Lumeran bay lòd pou arete  » Roro » Nelson, Vladimir Paraison, Reginald Delva…

Gonayiv, mèkredi 5 desanm 2018 .- Jij Dieunel Lumeran rann òdonans li nan kòmansman semèn nan sou dosye dividal zam otorite yo te sezi sou waf Senmak la. Aprè ansyen direktè jeneral Lapolis la, Godson Orélus ak Sandra Thelusma ki deja fèmen nan prizon, jij enstriksyon Dieunel Luméran mande pou arete 7 lòt moun pami yo bwa dwat ansyen prezidan Michel Joseph Martely, Ronald Nelson, tout moun konnen sou non Roro Nelson.

Gen plizyè lòt gwo palto nan pouvwa Tèt Kale a jij Lumeran mande pou fouke nan kad dosye sa tankou ansyen sekretè Leta sekirite piblik, Reginald Delva ak kòdonatè sekirite palè nasyonal ki fenk pèdi djòb li a, Vladimir Paraison

Sitwayen Jimmy Joseph, Junior Joel Joseph, Monplaisir Edouard, Durand Charles se lòt pèsonalite jij enstriksyon an mande pou yo arete nan òdonans la.

Lajistis sispèk moun sa yo kòm konplis nan trafik zam ilegal, asosyasyon malfektè, elatriye.

8 septanm nan lane 2016, otorite yo te sezi anviwon 150 fizi kalib 12, 9 fizi kalib douz ak 2 kanon, 5 fizi m4, 15 minòt, 10 bòt, 50 kès katouch kalib 38, 4 kès katouch 9 mm, 10 kès katouch 12 ki te debake sou waf Senmak la.

Kreyòl Enfo