Dosye kidnaping : Clifford Brandt rekonèt peche l

Gonayiv, vandredi 14 desanm 2018 .- Clifford Brandt rekonèt, jodi vandredi a (14), se li ki te pase lòd pou kidnape Nicolas ak Coralie Moscosso nan lane 2012.

Pandan yon odyans nan palè jistis Gonayiv la, Clifford Brandt ki pase 6 lane ap di li inosan deklare se li menm ki te pase sekirite epi bwa dwat li Edner Comé lòd pou kidnape 2 pitit Robert Moscosso yo. Mouche Brandt eksplike li te planifye kidnaping sa akoz yon kontra pou vann machin konpayi fanmi Brandt ak konpayi fanmi Moscosso t ap goumen pou jwenn nan men Leta ayisyen.

Clifford Brandt pa kache se li menm ki te bay akolit li yo machin pou pran Nicolas ak Coralie epi debloke lajan pou moun k ap siveye yo a. Li mande fanmi Moscosso padon pou mal li te fè yo akoz kidnaping sa.

Jij Denis Pierre k ap dirije pwosè a fikse yon lòt odyans pou 8 janvye 2019.

Kreyòl Enfo