Donald Trump pral rankontre Jovenel Moise ak 4 lòt dirijan nan Karayib la

Kreyòl Enfo, 20 mas 2019.- Nan yon kominike ki pote dat 19 mas, pòt pawòl prezidan ameriken an anonse Donald Trump pral chita pale ak senk (5) dirijan nan Karayib la pami yo Prezidan Jovenel Moise. Pandan rankont sa ki pral dewoule vandredi 22 mas la nan « Mar-a-Largo », Florid, Prezidan Etazini an pral diskite ak dirijan peyi Karayib yo sou zafè sekirite ak komès.

Nan kominike a, biwo kominikasyon prezidan ameriken an ekri  » Donald Trump anvi travay ak peyi ki nan rejyon an pou ranfòse koperasyon Etazini nan zafè sekirite epi goumen kont politik ekonomik Lachin. »

Lidè ameriken an ap pwofite rankont sa pou remèsye dirijan peyi Karayib yo k ap kore Etazini nan  » demach pou tabli lapè ak sekirite nan peyi Venezyela, k ap benyen nan yon kriz politik ak ekonomik « , daprè pòt vwa Donald Trump la, Sarah Sanders.

Rankont sa ap reyini dirijan Ayiti, Sent Lisi, Jamayik, Bahamas ak Repiblik Dominikèn.

Kreyòl Enfo