Depòtasyon : plizyè òganizasyon denonse otorite ameriken yo epi mande Leta ayisyen pran rèsponsabilite l

👤 Kreyòl Enfo

Kreyòl Enfo, 23 septann 2021.- Sèvis Jezwit Migran yo (SJM-Ayiti), Gwoup kap Apiye Rapatriye ak Refijye yo (GARR), nan tèt kole ak Rezo Fwontalye Jano Siksè (RFJS) di yo choke epi kondane desizyon administrasyon Joe Biden nan pran pou ddepòte dèyè do lalwa plizyè milye migran ki nan fwontyè Etazini ak Meksik.

SJM, GARR ak RFJS di yo twouble lè yo konstate move tretman ajan « Border Patrol » yo (sòlda ameriken ki sou cheval) bay migran ayisyen yo pandan yo t ap tante al pran refij sou tèritwa ameriken an. Òganizasyon sa yo kwè fason otorite amerikèn yo ap depòte migran yo kapab gwo konsekans sitou sou fanm ak timoun yo.

»   Dyaspora : Ayiti resevwa 2,98 milya dola transfè pandan ane 2018 la

Direktè SJM-Ayiti a, Pè Levelt Michaud, siyale Ayiti pa gen kapasite pou l resevwa tout konpatriyòt sa Etazini ap depòte yo. Li raple peyi a poko menm leve anba goudougoudou 14 dawout la ki makònen ak fenomèn ensekirite a.

Nan sans sa, 3 òganizasyon yo kole vwa yo ansanm pou mande otorite amerikèn yo kanpe sou depòtasyon migran ayisyen yo. SJM, GARR ak RFJS rekòmande Leta ayisyen pou pran responsablite l epi pran dispozisyon pou pi byen akeyi ayisyen k ap retounen nan peyi a. Yo konseye dirijan yo mete sou pye yon vrè pwogram sosyal pou ede moun ki pi vilnerab yo nan lide pou yo ka viv ak tout diyite yo nan peyi a.

»   Etazini kont tout lide pou òganize yon referandòm konstitisyonèl Ayiti

Kreyòl Enfo

ou ka enterese