Charles Suffrard, pèsonaj moun plis konnen nan komite prezidansyèl sou zafè dyalòg la, demisyone

Kreyòl Enfo, 25 fevriye 2019 .- Komite pou fasilite dyalòg nan mitan ayisyen yo prezidan Jovenel Moise kreye jedi pase a deja ap pèdi plim. Charles Suffrard, lidè peyizan nan depatman Latibonit, konfime li demisyone nan komite sa ki ta dwe enstale pandan jounen lendi a.

Rèsponsab Koze Pèp la ki deja voye lèt demisyon an bay prezidan Jovenel eksplike li 《pran desizyon sa aprè kominike sekretè jeneral palè a ki anonse komite a gen misyon pou travay sou fòmasyon yon lòt gouvènman. Sa pa travay komite a. Se prezidan peyi a ak palman an konstitisyon an bay misyon pou regle koze gouvènman》.

Charles Suffrard fè kwè pandan rankont manm komite a te genyen ak prezidan Repiblik la, yo pat janm pale sou sa ki nan kominike palè nasyonal la. Mouche Suffrard regrèt《kominike sa pibliye dèyè do manm yo》.

Komite prezidansyèl pou fasilite dyalòg nan mitan ayisyen yo te genyen ladan l sèt (7) manm : Kettely Julien, Charles Suffrard, Marie-Carmel Mentor, Carlo Joseph, Dorothie Sénatus, Marie Michèle Sylvie Rameau ak Rudolf Dérose.

Kreyòl Enfo