Kreyòl Enfo, 19 jiyè 2020.- Pou pi piti yon moun mouri epi plizyè lòt blese anba bal, aswè dimanch la (19), pandan yon banbòch kiltirèl devègonde yo rele » Car Wash » nan ri lantèman, sant Pòtoprens. Yon aktivite ki reyini plizyè mil pleziyis nan mitan yon epidemi.
Daprè esplikasyon kèk temwen pataje ak redaksyon Kreyòl Enfo (KE), eskonbrit la pete pandan ajan fòs lòd yo akonpaye ak reprezantan pakè Pòtoprens te debake nan pwogram sa epi tire anpil katouch pou gaye yon foul jenn fanm ak jenn gason ki t ap pran plezi yo tèt kale malgre epidemi Kowonaviris la. Banbochè yo, san kachnen, te tonbe kouri nan tout direksyon. Kèk nan yo te reponn otorite yo ak anpil kout wòch ak kout boutèy.
Enfòmasyon yo fè kwè te gen sivil ak zam tou nan mitan pleziyis yo. Pou kounye a, poko gen okenn enfòmasyon ofisyèl sou zam ki ta tire moun ki mouri a. Toutfwa, plizyè moun akize lapolis kòm prensipal rèsponsab ensidan sa.
Aktivite « Car Wash » sa òganize nan divès katye zòn metwopolitèn Pòtoprens la malgre Leta ayisyen entèndi pwogram ki reyini anpil akoz pandemi Kovid-19 la. Anpil obsèvatè swete otorite yo arete epi pini tout endividi ki mele nan òganize banbòch devègonde sa yo.
Kreyòl Enfo