« Car wash » : 3 moun mouri ak 2 lòt blese ayè dimanch la

Kreyòl Enfo, 5 dawout 2019.- Pou pi piti 3 moun mouri epi 2 lòt blese, dimanch 4 dawout la, pandan aktivite ki rele « Car wash » ki òganize nan divès katye nan kapital la.

Devan Fakilte Etnoloji gen 2 moun pami yo, yon jèn fi ki mouri anba bal pandan aktivite sa a yèswa. Kadav viktim yo te rete atè jouk bò 8tè maten lendi a. Yon lòt jèn gason pèdi lavi l tou nan kalfou ri Oswald Durand (bò rilaks).

Daprè obsèvasyon Kreyòl Enfo, « Car wash » la se yon aktivite « DJ » ki reyini plizyè milye jèn gason ak jèn fanm chak wikenn. Pandan aktivite sa, jèn yo mete rad blan epi yon gwoup ap wouze foul la ak dlo ki nan yon gwo doum.

Ri Lantèman, Devan Fakilte Etnoloji, Pòs Machan, Kafoufèy se kèk zòn ki gen « Car wash » chak wikenn.

Kreyòl Enfo