Boutofen, pwojè lwa finans 2018-2019 la depoze nan palman an

Pòtoprens, mèkredi 12 desanm 2018.- Minis Ekonomi ak Finans la, Ronald G. Decembre, depoze ofisyèlman, madi 11 desanm nan, pwojè lwa finans pou egzèsis fiskal 2018-2019 la.

172.8 se kantite lajan ki prevwa nan bidjè sa, daprè minis ekonomi ak finans la ki presize sektè sosyal se priyorite gouvèman an.

Pandan egzèsis 2018-2019 la, gouvèman an prevwa konstwi 40 sant sante nan 40 seksyon kominal peyi a. Responsab sante yo pral achte 30 anbilans pandan peryòd sa tou, daprè Ronald Decembre. Minis la fè kwè Fon asistans ekonomi ak sosyal (FAES) pral egzekite plizyè pwogram sosyal pou soulaje popilasyon an.

Nan menm bidjè sa, Leta prevwa 4 milya goud pou pèmèt anplwaye Administrasyon piblik la benefisye ogmantasyon ki fèt nan salè minimòm nan. Gouvèman an dispoze 2.5 milya goud pou konpayi petwòl yo kapab konble defisi epi peye dèt ki koute 2 milya goud, daprè minis Decembre.

Òganizasyon eleksyon pandan ane 2019 la se yon priyorite tou pou gouvèman an. Leta prevwa 40 milyon dola vèt pou fè kat idantifikasyon nasyonal (KIN) ak paspò.

Bidje 2018-2019 la te deja depoze nan palman an, men li te retounen al jwenn gouvenman akoz evènman 6, 7 ak 8 jiyè 2018 yo ki te oblije pouvwa a tounen sou desizyon pou monte pri gaz yo.

Kreyòl Enfo