Bandi touye epi rache yon DJ ak kout manchèt

Pòtoprens, mèkredi 5 desanm 2018 .-Endividi otorite yo poko idantifye touye, nan lanwit lendi 3 desanm nan, Roosevelt Exius ( DJ Roosevelt ) nan zòn Savann Chat, yon lokalite senkyèm seksyon, komin Gwomòn.

Daprè LoopHaiti, jij depè Marie Claude Alfred Michel ki te fè konsta legal yo di li jwenn kadav DJ Roosevelt filange anba kout manchèt ansanm ak 2 twou bal bò lestomak li.

Abitan nan kanton an rakonte se pandan DJ a t ap fè moun pyafe ak mizik nan yon pwogram, yon endividi vin rele l epi deplase avè l. Konsa, Roosevelt Exius, 38 lane, pa janm tounen.

Gen abitan zòn ki eksplike yo te tande bri bal nan mitan lanwit lendi 3 desanm nan men, yo pat soti pou gade sa k ap pase, daprè rapò jij depè Marie Claude Alfred Michel ki siyale se pa premye zak sa yo ap fèt nan lokalite Savann Chat.

Kreyòl Enfo