Ensekirite 

Bandi sou moto louvri kout zam sou direktè jeneral annapre Kès asistans sosyal la

Kreyòl Enfo , ,

Pòtoprens, mèkredi 28 novanm 2018 .- Direktè jeneral annapre Kès asistans sosyal la (KAS) , Devallon Elionord resevwa plizyè bal aprè midi mèkredi a (28) nan zòn avni Kristòf (kè Pòtoprens) tou kole ak Lakou Dèkont (CSC/CA, sig nan lang franse). Yon ajan sekirite direktè a ta pèdi lavil pandan atak sa.

Daprè enfòmasyon ki rive jwenn Kreyòl Enfo se bandi sou moto ki louvri katouch sou ansyen kandida pou pòs depite twazyèm sikonskripsyon Pòtoprens la ki pou kounye a ap pran laswenyay sou kabann yon lopital nan kapital la.

Machin ensekite a pa sispann vale teren nan kapital la ak lantouray li pandan dènye jou sa yo. Pou jodi mèkredi a, pou pi piti 3 moun tonbe anba bal zagoloray pami yo yon enspektè polis.