Bandi kontinye ap fè lalwa Lasalin, depite Millien lonje dwèt sou pouvwa Tèt Kale a

Zam pa sispann chante nan katye Lasalin , Pòtoprens, kote bandi ak zam deja touye plis pase 30 moun ep blese anpil lòt, daprè depite premye sikonskripsyon an Roger Millien.

Jedi 15 novanm lan, yon lòt fwa anko, nèg ak zam lage laperèz lakay ti machan ak moun ki rete nan. Sa ki anpeche anbal lavil la fonksyone jan sa abitye fèt.

Depite premye sikonskripsyon Pòtoprens la, Roger Millien di se yon masak ki fèt sou abitan Lasalin nan lannwit madi 13 novanm pase a. Palmantè an lonje dwèt sou sou pouvwa Tèt Kale a kòm responsab zak sa yo.

Senatè depatman Lwès la, Antonio Cheramy anonse li pral ekri prezidan sena a, Joseph Lambert, pou konvoke Konsèy siperyè polis nasyonal la (Cspn) sou ensekirite k ap vale tèren nan zòn metwopolitèn Pòtoprens la espesyalman sou zak sitiyasyon malouk k ap pase nan katye Lasalin.

Jouk jounen jodi a, okenn otorite poko fè limyè sou sitiyasyon k ap devlope zòn Lasalin ak nan lantouray yo.