Home Aktyalite Ayiti-Tansyon : yon timoun 6 lane mouri Senmak

Ayiti-Tansyon : yon timoun 6 lane mouri Senmak

by Kreyòl Enfo

Kreyòl Enfo, 18 septanm 2019 .- Trajedi nan komin Senmak (Latibonit) kote Rutheda Pierre, ti fi 6 lane, pèdi lavi l, jodi mèkredi a (18), pandan mouvman pwotestasyon kont pwoblèm gaz ki genyen nan peyi a.

Daprè enfòmasyon ki rive jwenn redaksyon Kreyòl Enfo, dram sa rive nan moman yon gwoup endividi t ap tante pran yon gwo kamyon siman pou bare wout la. Chofè a ki t ap tante retounen ak kamyon an ta pral monte sou motosiklèt ki t ap mennen Rutheda Pierre lekòl. Tilanj la mouri lapoula.

Gran papa viktim nan ki te ansanm ak li sou motosiklèt la soti blese nan aksidan sa. Pou kounye a, l ap resevwa laswenyay nan lopital Sen Nikola, Senmak.

Plizyè moun deja pèdi lavi yo pandan gwo katchouboumbe ki pete nan peyi a akoz pwoblèm lamizè ak gaz ki manke nan ponp yo.

Kreyòl Enfo

0 comment