Ayiti-Tansyon : yon jounalis blese anba bal kawoutchou

Kreyòl Enfo, 16 jen 2019 .- Raynald Petit-Frère, jounalis radyo Signal FM, resevwa 2 bal kawoutchou, jodi dimanch la (16 jen), pandan li t ap kouvri yon manifestasyon kont pouvwa a nan kapital la (Pòtoprens).

Enfòmasyon viktim nan pataje ak Kreyòl Enfo konfime se yon machin Lapolis ki louvri katouch sou yon gwoup jounalis ki te kanpe nan zòn Channmas la. Jounalis Raynald Petit- Frère siyale kat laprès li te parèt byen klè nan moman polisye yo te tire sou li.

Ansyen jounalis Mélodie FM nan, k ap pran swen nan yon lopital nan Kapital la, kondane konpòtman fòs lòd yo. Li swete otorite yo konprann travay jounalis yo ki la pou enfòme popilasyon an.

Depi dimanch 9 jen pase a, aprè piblikasyon 2e rapò Lakoudèkont sou lajan Petwokaribe a, yon gwo mobilizasyon pou egzije demisyon Chèf Leta a Jovenel Moïse deklannche nan peyi a. Plizyè jounalis deja viktim pandan y ap fè travay yo.

Kreyòl Enfo