Ayiti – Tansyon : Latwoublay nan vil Senmak, 2 moun mouri

Pou pi piti 2 moun pèdi lavi yo nan komin Senmak, depatman Latibonit, jodi madi a (11), pandan yon sitiyasyon panik nan estasyon Pòtay Gèp.

Yon nan majistra vil la , Frantz Ulysse, Kreyòl Enfo te kontakte eksplike eskonbrit la pete aprè yon chofè te fin frape yon madanm ki mouri lapoula pandan li tap tante chape pou li pa pase anba enspeksyon lapolis t ap fè nan estasyon Pòtay Gèp la. Aprè lanmò dam nan, tout moun kite nan estasyon an te kouri dèyè chofè a ki gentan chape poul li.

Dezyèm moun nan mouri anba bal pandan inite espesyalize nan lapolis, UDMO, t ap eseye reprann kontwòl sitiyasyon an, daprè Frantz Ulysse.

Popilasyon an ki move kou kong te tire anpil wòch sou komisarya, lameri, lopital Senmak la ak lòt batiman piblik ki nan vil la

Jouk kounye a (4:30), sitiyasyon an toujou rete magonmen nan zòn Pòtay Gèp.

Kreyòl Enfo