Ayiti : Pandan yon semèn, 24 moun mouri nan aksidan

Kreyòl Enfo, 5 dawout 2019.- Disèt (17) moun pou pi piti mouri pandan sèl jounen dimanch 4 dawout la nan plizyè aksidan òganizasyon « Stop Accident » anrejistre nan tout peyi a.

Douvanjou dimanch lan, nan zòn Dichiti, depatman Grandans, yon gwo kamyon chavire epi lakoz onz (11) moun mouri lapoula. De (2) lòt sitwayen pèdi lavi yo tou nan Dèlma 60, toujou daprè enfòmasyon « Stop Accident ».

Marie Bettyna Jacques, yon polisye fanm, peri nan yon aksidan machin ansanm ak yon lòt moun sou wout nasyonal nimewo 1 an, pandan yo t ap soti nan festival Bikini.

Youn nan responsab « Stop Accident » yo, doktè Garnel Michel, presize gen 24 moun ki mouri pandan 31 aksidan yo anrejistre pandan semèn nan.

Doktè Michel di li regrèt moun kontinye pèdi lavi yo akoz aksidan nan peyi a. Li pwomèt òganizasyon an ap rapouswiv ak sansibilizasyon pou ede diminye kantite viktim sou wout yo.

Kreyòl Enfo