Kreyòl Enfo, 24 me 2020.- Ministè Sante Piblik ak Popilasyon (MSPP) konfime, aswè samdi 23 me, nan yon avi ki pote nimewo 53, nouvo kowonaviris la touye yon lòt moun nan peyi a epi kontamine 53 nouvo sitwayen.
Kantite moun ki enfekte yo deja rive 865. Pami kontamine yo gen 817 ka aktif, 26 mouri epi 22 rive retabli anba maladi a, daprè otorite lasante yo ki presize 59,9% moun ki kontamine yo se gason epi 40,1% fanm.
289 sitwayen kouche sou kabann lopital akoz maladi a, 700 lòt nan karantèn lakay yo. Otorite lasante yo sispèk 2 718 moun ka gen viris la nan kò yo. Gen dispozisyon ki deja pran pou fè tès kovid-19 pou tout sispèk yo.
Ministè Sante Piblik ak Popilasyon (MSPP) kontinye mande popilasyon an respekte prensip ijèn ak sekirite yo yon mannyè pou anpeche epidemi kovid-19 la gaye plis toujou nan peyi a.
Kreyòl Enfo