Ayiti-Kiba : Pwoblèm tikè lakoz gwo panik devan estad Sylvio Cator

Kreyòl Enfo, 24 mas 2019 .- Fanatik ki t ap tann dènye moman pou achete kat (tikè) k ap pèmèt yo asiste match seleksyon nasyonal la kont Kiba nan estad Sylvio Cator, aprè midi dimanch la (6:30), riske dòmi deyò.

Yon sous nan Federasyon Ayisyèn Foutbòl la (FH) konfime pou Kreyòl Enfo anviwon 10 000 tikè òganizatè yo te mete pou vann nan deja fini.

Toutfwa, plizyè santèn moun gonfle devan baryè estad la nan mitan jounen an ak lespwa y ap jwenn yon dènye tikè pou al chofe grenadye yo. Sa ki kreye gwo panik nan tout lantouray estad la kote gen fanatik ki menase pou boule kawoutchou si yo pa jwenn kat.

Lapolis arete yon raketè ki t ap fè fanatik yo peye 500 goud pou yon kat graden alòske, Federasyon an te fikse pri a 250 goud.

Grenadye yo pral afwonte Kiba pou dènye jounen Lig chanyon peyi Konkakaf yo.

Kreyòl Enfo