Kreyòl Enfo, 30 me 2020.- Ofisyèlman nouvo kowonaviris la enfekte 1 584 moun nan tout peyi a, 141 pandan dènye 24 èd tan yo, daprè Ministè Sante Piblik ak Popilasyon. Tablo Òganizasyon Mondyal Sante (OMS) prepare sou evolisyon pandemi an nan mond la montre Ayiti klase 98e sou 215 peyi ak tèritwa kote kovid-19 la deja prezan.
Ayiti deja gen plis moun kontamine pase prèske yon tyè (1/3) nan peyi nan zòn Amerikdisid la tankou Venezyela (1 370), Paragwe (964), Irigwe (816). Epidemi an gentan touye plis moun ap Ayiti pase peyi sa yo tou.
Nan rejyon Karayib la, se sèlman Repiblik Dominikèn (16 531) ak Kiba ki gen plis moun kontamine ak kowonaviris pase Ayiti. Peyi tankou Jamayik (575), Matinik (200), Gwadloup (162) ak Trinidad &Tobago vini byen lwen dèyè Ayiti nan tablo OMS la.
Afrik, plizyè peyi kote popilasyon yo pi gran pase Ayiti gen pi piti moun ki kontamine. Malgre yon popilasyon plis pase 114 milyon moun, Etyopi gen sèlman 1 063 moun ki kontamine. Mali, Boukinafaso ak Madagaska se kèk lòt peyi sou kontinan afriken an viris la poko kontamine menm 1 300 moun malgre gwosè popilasyon yo.
Depi otorite lasante yo te fin konfime prezans viris la nan peyi a 19 mas pase a epidemi kovid-19 la pa sispann gaye. Pandan yon semèn kantite moun ki enfekte yo double soti 865 samdi pase a pou rive 1 584 ayè vandredi a.
Direktè depatmantal sante Lwès la, Doktè Martial Bénêche, rekonèt pandan yon entèvansyon ayè epidemi kovid-19 la chape anba kontwòl otorite yo.
Kreyòl Enfo