Home Aktyalite Ayiti, enstitisyon ki disponib pou fè tès kowonaviris la konsantre nan kapital la

Ayiti, enstitisyon ki disponib pou fè tès kowonaviris la konsantre nan kapital la

by Kreyòl Enfo

Kreyòl Enfo, 29 me 2020.- Direktè demantal sante Lwès la, Martial Bénêche, pote presizyon jodi a sou lopital ki disponib nan peyi a pou yon sitwayen fè tès kovid-19 la. Pou kounye a, kat (4) lokal ki gen kapasite pou fè tès sa twouve yo nan zòn metwopolitèn Pòtoprens la.

Lopital Siti Med (Dèlma 19), Sen Lik (Taba), Medsen san fwontyè (Dwouya) ak Sant Jeskyo (Pòtoprens) se 4 enstriksyon ki disponib pou fè tès nouvo kowonaviris la nan zòn metwopolitèn Pòtoprens la, daprè direktè demantal sante Lwès la. Doktè Martial Bénêche anonse 2 lòt sant pou fè tès kovid-19 ap disponib nan jou k ap vini la yo nan zòn metwopolitèn Pòtoprens la. Youn ap nan sant olenmpik la (Wout 9) epi lòt la ap nan sant espòtif Kafou a.

Sepandan, menm sitwayen k ap viv nan kapital ak zòn ki nan lantouray li yo gen gwo difikilte pou fè tès kovid-19 la. Plizyè nan yo rapòte pwofesyonèl lasante ki nan enstitisyon sa yo di tès la disponib sèlman pou moun ki deja ap soufri byen grav ak tout sentom yo.

Nouvo kowonaviris la gaye nan tout peyi a. Daprè dènye bilan Ministè Sante Piblik ak Popilasyon pibliye aswè vandredi a, 1584 moun deja kontamine pami yo 35 mouri.

Kreyòl Enfo

0 comment